ສຶກສາພຶດຕິກຳ ແລະ ປັດໄຈທີ່ມີຜົນຕໍ່ການຍອມຮັບເຕັກໂນໂລຊີທາງການເງິນແອັບພິເຄຊັ່ນ Mobile Banking ຂອງຜູ້ໃຊ້ບໍລິການໃນນະຄອນຫລວງວຽງຈັນ

A Study on Behavior and Factors that Influence Acceptance financial Technology Mobile Banking Application of Service users in Vientiane Capital

Abstract

ບົດຄັດຫຍໍ້

ການສຶກສາພຶດຕິກຳ ແລະ ປັດໄຈທີ່ມີຜົນຕໍ່ການຍອມຮັບເຕັກໂນໂລຊີທາງການເງິນແອັບພິເຄຊັ່ນ Mobile Banking ຂອງຜູ້ໃຊ້ບໍລິການໃນນະຄອນຫລວງວຽງຈັນ ໂດຍຈຸດປະສົງເພື່ອຊອກຮູ້ພຶດຕິກໍາການນໍາໃຊ້ແອັບພິເຄຊັ່ນທີ່ມີຜົນຕໍ່ການຍອມຮັບເຕັກໂນໂລຊີທາງການເງິນ ແລະ ເພື່ອປະເມີນລະດັບຄວາມສຳຄັນຂອງປັດໄຈທີ່ມີຜົນຕໍ່ການຍອມຮັບເຕັກໂນໂລຊີທາງການເງິນແອັບພິເຄຊັ່ນ Mobile Banking ຂອງຜູ້ໃຊ້ບໍລິການໃນນະຄອນຫລວງວຽງຈັນ. ໂດຍໄດ້ນໍາໃຊ້ຂໍ້ມູນປະຖົມພູມທີ່ໄດ້ຈາກການສອບຖາມລູກຄ້າຜູ້ທີ່ຊົມໃຊ້ໃນນະຄອນຫຼວງວຽງຈັນຈໍານວນ 399 ຕົວຢ່າງ ແລະ ນໍາໃຊ້ວິທີການຄົ້ນຄວ້າແບບປະລິມານຊື່ງຜ່ານການຄົ້ນຄ້ວາໄດ້ຜົນດັ່ງນີ້: ຜົນການຄົ້ນ   ຄ້ວາຂໍ້ມູນທົ່ວຂອງຜູ້ຕອບແບບສອບຖາມພົບວ່າ: ເພດຍິງຕອບແບບສອບຖາມຫຼາຍກວ່າມີຈຳນວນ 214 ຄົນ ກວມ 53.6%, ດ້ານອາຍຸເຫັນວ່າຊ່ວງອາຍຸ 29 ຫາ 39 ປີ  ຕອບແບບຖາມຫຼາຍກວ່າໝູ່ເຊີ່ງມີຈໍານວນ 198 ຄົນ ກວມເອົາ 49.6%,    ສໍາລັບລະດັບການສືກສາ ເຫັນວ່າຢູ່ໃນລະດັບລິນຍາຕີແມ່ນກວມເອົາຫຼາຍກວ່າໝູ່ມີຈຳ ນວນ 281 ຄົນ ກວມເອົາ 70.4%,  ສໍາລັບດ້ານອາຊີບແມ່ນເຫັນວ່າພະນັກງານລັດ/ລັດວິສະຫະກິດມີຈຳນວນ 169 ຄົນ ກວມເອົາ 42.4%, ສຳລັບດ້ານລາຍຮັບແມ່ນເຫັນວ່າຜູ້ທີ່ມີລາຍຮັບຫຼາຍກວ່າ  4,000,001 ກີບຂື້ນໄປ ກວມເອົາຫຼາຍກວ່າໝູ່ມີຈໍານວນ 189 ຄົນ ກວມເອົາ 47.4%. ຜົນການຄົ້ນຄ້ວາຂໍ້ມູນດ້ານພຶດຕິກຳຂອງຜູ້ນຳໃຊ້ ແອັບພິເຄຊັ່ນ Mobile Banking ໃນນະຄອນຫຼວງວຽງຈັນພົບວ່າ: ຜູ້ຕອບແບບສອບຖາມນຳໃຊ້ BCEL ONE ແມ່ນມີຈຳນວນ 157 ຄົນ ກວມເອົາ 39,2%, ທະນາຄານພັດທະນາລາວ LDB Trust ມີຈຳນວນ 108 ຄົນ ກວມເອົາ 27%, ທະນາຄານຮວ່ມພັດທະນາ JDB Yes Pay ມີຈໍານວນ 60 ຄົນ ກວມເອົາ 15% ແລະ ທະນາ ຄານຮວ່ມທຸລະກິດລາວ-ຫວຽດ LVB DigiBank ມີ 74 ຄົນ ກວມເອົາ 18,8%. ການນໍາໃຊ້ແອັບພິເຄຊັ່ນ Mobile Banking ສ່ວນຫຼາຍແມ່ນໃຊ້ເພື່ອຊໍາລະຄ່າສິນຄ້າ ຫຼື ການບໍລິການຫຼາຍກວ່າໝູ່ ມີຈໍານວນ 153 ຄົນ ກວມເອົາ 38.3%, ສະຖານທີ່ມັກນໍາໃຊ້ແອັບພິເຄຊັ່ນ Mobile Banking ຫຼາຍກວ່າໝູ່ແມ່ນບ່ອນເຮັດວຽກຫຼາຍກວ່າໝູ່ ມີຈໍານວນ 181 ຄົນ ກວມເອົາ 45.4%, ຄວາມຖີ່ໃນການນຳໃຊ້ແອັບພິເຄຊັ່ນ Mobile Banking ແມ່ນຫລາຍກວ່າ 6 ຄັ້ງຕໍ່ອາທິດ    ຫລາຍກວ່າໝູ່ ມີຈໍານວນ 281 ຄົນ ກວາມເອົາ 70.4%, ລູກຄ້າສ່ວນໃຫຍ່ຮູ້ຈັກ ແອັບພິເຄຊັ່ນ Mobile Banking ໂດຍຜ່ານການແນະນຳຂອງພະນັກງານ ທະນາຄານ ມີ ຈຳນວນ  120 ຄົນ ກວມເອົາ 30.1%, ສາເຫດທີ່ເລືອກໃຊ້ ແອັບພິເຄຊັ່ນ Mobile Banking 179 ຄົນ ເລືືອກໃຊ້ແມ່ນສາມາດທໍາລະກໍາໄດ້ 24 ຊົ່ວໂມງ ກວມເອົາ 44.9%. ຜົນການຄົ້ນຄວ້າດ້ານສົມມຸດຖານ ດ້ານເພດຕໍ່ກັບດ້ານຄຸນນະພາບຂອງຂໍ້ມູນ, ດ້ານຄຸນນະພາບຂອງລະບົບ, ດ້ານການຮັບຮູ້ຄວາມສ່ຽງ, ດ້ານການຮັບຮູ້ປະໂຫຍດ, ດ້ານການຍອມຮັບ ສະແດງໃຫ້ເຫັນວ່າ ມີຄວາມແຕກຕ່າງກັນ. ແຕ່ດ້ານຄຸນນະພາບການບໍລິການສະແດງໃຫ້ເຫັນວ່າແມ່ນບໍ່ແຕກຕ່າງກັນ.  ດ້ານອາຍຸຕໍ່ກັບດ້ານຄຸນນະພາບຂອງຂໍ້ມູນ, ດ້ານຄຸນນະພາບຂອງລະບົບ, ດ້ານຄຸນນະພາບການບໍລິການ, ດ້ານການຮັບຮູ້ຄວາມສ່ຽງສະແດງໃຫ້ເຫັນວ່າ ມີຄວາມແຕກຕ່າງກັນ. ແຕ່ດ້ານການຮັບຮູ້ປະໂຫຍດ  ແລະ ດ້ານການຍອມຮັບ ສະແດງໃຫ້ເຫັນວ່າ ແມ່ນບໍ່ແຕກຕ່າງກັນ. ດ້ານລະດັບການສຶກສາຕໍ່ກັບດ້ານຄຸນນະພາບຂອງຂໍ້ມູນ, ດ້ານຄຸນນະພາບຂອງລະບົບ, ດ້ານຄຸນນະພາບການບໍລິການ ສະແດງໃຫ້ເຫັນວ່າ ມີຄວາມແຕກຕ່າງກັນ. ແຕ່ດ້ານການຮັບຮູ້ຄວາມສ່ຽງ ,ດ້ານການຮັບຮູ້ປະໂຫຍດ ແລະ ດ້ານການຍອມຮັບ ສະແດງໃຫ້ເຫັນວ່າ ແມ່ນບໍ່ແຕກຕ່າງກັນ.  ດ້ານອາຊີບຕໍ່ກັບດ້ານຄຸນນະພາບຂອງຂໍ້ມູນ, ດ້ານຄຸນນະພາບຂອງລະບົບ, ດ້ານຄຸນນະພາບການບໍລິການ, ດ້ານການຮັບຮູ້ຄວາມສ່ຽງສະແດງໃຫ້ເຫັນວ່າ ມີຄວາມແຕກຕ່າງກັນ. ແຕ່ດ້ານການຮັບຮູ້ປະໂຫຍດ  ແລະ ດ້ານການຍອມຮັບ ສະແດງໃຫ້ເຫັນວ່າ ແມ່ນບໍ່ແຕກຕ່າງກັນ. ດ້ານລາຍຮັບຕໍ່ກັບດ້ານຄຸນນະພາບຂອງລະບົບ, ດ້ານຄຸນນະພາບການບໍລິການ ແລະ ດ້ານການຍອມຮັບ ສະແດງໃຫ້ເຫັນວ່າ ມີຄວາມແຕກຕ່າງກັນ. ແຕ່ດ້ານຄຸນນະພາບຂອງຂໍ້ມູນ, ດ້ານການຮັບຮູ້ຄວາມສ່ຽງ ແລະ ດ້ານການຮັບຮູ້ປະໂຫຍດ ສະແດງໃຫ້ເຫັນວ່າບໍ່ແຕກຕ່າງກັນ.

ຄຳສັບຫຼັກ: ເຕັກໂນໂລຊີທາງດ້ານການເງິນ, ການບໍລິການໂທລະສັບມືຖືຜ່ານລະບົບທະນາຄານ