ສຶກສາທ່າແຮງໃນການສົ່ງອອກສິນຄ້າອຸດສາຫະກຳ ກໍລະນີສຶກສາ: ການສົ່ງອອກເກີບໄປເອີຣົບ

The Export Potential of Industrial Product Case Study: Exporting Footwear to the EU Market

Abstract

ບົດຄັດຫຍໍ້

ການຄົ້ນຄ້ວາຄັ້ງນີ້ແມ່ນສຶກສາກ່ຽວກັບທ່າແຮງການສົ່ງອອກສິນຄ້າອຸດສາຫະກຳ ກໍລະນີສຶກສາ ການສົ່ງອອກເກີບໄປເອີຣົບ. ເພື່ອວິເຄາະເຖິງພາບລວມຂອງການສົ່ງອອກຂອງລາວໄປເອີຣົບ ແລະ ສຶກສາທ່າແຮງໃນການສົ່ງອອກເກີບໄປເອີຣົບ ເມື່ອປຽບທຽບກັບປະເທດຄູ່ແຂ່ງທີ່ສຳຄັນ ໃນຊ່ວງປີ 2014-2021 ໂດຍນຳໃຊ້ດັດຊະນີຄວາມໄດ້ປຽບໂດຍປຽບທຽບທີ່ປະກົດ (RCA), ແບບຈຳລອງສ່ວນແບ່ງຕະຫຼາດຄົງທີ່, ຄວາມໄດ້ປຽບດ້ານອັດຕາພາສີ, ດັດຊະນີທ່າແຮງໃນການສົ່ງອອກ ແລະ ທ່າແຮງທີ່ບົ່ມຊ້ອນຢູ່. ຈາກຜົນການສຶກສາເຫັນວ່າໃນປີ ​2020 ລາວແມ່ນມີການສົ່ງອອກໄປເອີຣົບມູນຄ່າ 249,752 ພັນໂດລາສະຫະລັດ ໃນການສົ່ງອອກສິນຄ້າຂອງລາວໄປເອີຣົບສ່ວນໃຫຍ່ໄດ້ແກ່ ເຄື່ອງນຸ່ງຫົ່ມ, ເກີບ ແລະ ສິນຄ້າກະສິກຳ. ຕັ້ງແຕ່ ປີ 2016-2021 ລາວແມ່ນມີດັດຊະນີຄວາມໄດ້ປຽບໂດຍປຽບທຽບມີຄ່າຫຼາຍກ່ວາ 1 ນັ້ນໝາຍຄວາມວ່າ ປະເທດລາວແມ່ນມີຄວາມໄດ້ປຽບໂດຍປຽບທຽບໃນການສົ່ງອອກເກີບໄປເອີຣົບ ແລະ ແນວໂນ້ມທີ່ຈະເພີ່ມຂຶ້ນອີກ. ໃນຊ່ວງປີ 2014-2017 ປຽບທຽບກັບຊ່ວງປີ 2018-2021 ເຫັນວ່າລາວມີມູນຄ່າການສົ່ງອອກເພີ່ມຂຶ້ນໂດຍປັດໄຈທີ່ສົ່ງຜົນຫຼາຍທີ່ສຸດແມ່ນຜົນຈາກການແຂ່ງຂັນທີ່ແທ້ຈິງ. ສ່ວນການວິເຄາະຫາຄວາມໄດ້ປຽບທາງດ້ານພາສີໃນການສົ່ງອອກເກີບຂອງລາວ ແມ່ນມີຄ່າຫຼາຍກ່ວາ 0 ກັບປະເທດບັນດາປະເທດສະມາຊິກກຸ່ມເອີຣົບໄດ້ແກ່ ເນເທີແລນ, ເຢຍລະມັນ, ອັງກິດ ເຊິ່ງມີຄ່າ 0.019; 0.027; 0.041 ແລະ ຕາມລຳດັບ ໝາຍຄວາມວ່າ ສປປ ລາວ ມີຄວາມໄດ້ປຽບທາງດ້ານພາສີກັບບັນດາປະເທດເຫຼົ່ານີ້. ທ່າແຮງໃນການສົ່ງອອກເກີບຂອງລາວໄປເອີຣົບແມ່ນສູງທີ່ສຸດໃນປີ 2020 ມີມູນຄ່າ 6,525.2  ພັນໂດລາສະຫະລັດ ແລະ ໃນປີ 2021 ປະເທດລາວມີການສົ່ງອອກຕົວຈິງຫຼາຍກ່ວາທ່າແຮງໃນການສົ່ງອອກ ສາມາດສົ່ງອອກໄດ້ເຖິງ 32 ພັນໂດລາສະຫະລັດ, ໃນຂະນະທີ່ທ່າແຮງໃນການສົ່ງອອກເກີບມີ 21 ພັນໂດລາສະຫະລັດ ໝາຍຄວາມວ່າ ສປປ ລາວ ສາມາດບັນລຸທ່າແຮງໃນການສົ່ງອອກເກີບ ໄດ້ເກີນຄາດໝາຍທີ່ຕັ້ງເປົ້າໄວ້ໄດ້ໃນຕະຫຼາດເອີຣົບ.

ຄຳສັບທີ່ສຳຄັນ: ທ່າແຮງໃນການສົ່ງອອກ; ຄວາມໄດ້ປຽບໂດຍປຽບທຽບ; ແບບຈຳລອງສ່ວນແບ່ງຕະຫຼາດຄົງທີ່.