ປັດໄຈທີ່ມີຜົນຕໍ່ການກໍ່ໜີ້ຂອງກຸ່ມຄົນໄວອອກແຮງງານໃນຊ່ວງການແຜ່ລະບາດຂອງພະຍາດໂຄວິດ-19

Factors Affecting Indebtedness of the Working-Age Group in Vientiane Capital During the COVID-19 Pandemic

Abstract

ບົດຄັດຫຍໍ້

             ຈາກສະພາບເສດຖະກິດທີ່ຖົດຖອຍອັນເນື່ອງມາຈາກການແຜ່ລະບາດຂອງພະຍາດໂຄວິດ-19 ທີ່ແກ່ຍາວ ສົ່ງຜົນເຮັດໃຫ້ລາຍໄດ້ຂອງປະຊາຊົນຫຼຸດລົງ ແຕ່ໃນທາງກົງກັນຂ້າມຍັງມີຄວາມຕ້ອງການເງິນເພື່ອນຳມາຈັບຈ່າຍໃຊ້ສອຍຫຼາຍຂຶ້ນ ຈຶ່ງຈໍາເປັນຕ້ອງມີການນໍາເອົາເງິນໃນອະນາຄົດມາໃຊ້ຈ່າຍໃນປັດຈຸບັນຈົນນໍາໄປສູ່ການກໍ່ໜີ້ທີ່ເປັນພາລະຜູກພັນ. ຫົວຂໍ້ໃນການການຄົ້ນຄວ້າຄັ້ງນີ້ແມ່ນ “ປັດໄຈທີ່ມີຜົນຕໍ່ການກໍ່ໜີ້ຂອງກຸ່ມໄວອອກແຮງງານໃນນະຄອນຫຼວງວຽງຈັນຊ່ວງການແຜ່ລະບາດຂອງພະຍາດໂຄວິດ-19” ມີຈຸດປະສົງເພື່ອສຶກສາເຖິງ ຄວາມຮູ້ທາງການເງິນຂອງກຸ່ມໄວເຮັດວຽກໃນນະຄອນຫຼວງວຽງຈັນ ແລະ ເພື່ອສຶກສາປັດໄຈທີ່ມີຜົນຕໍ່ການກໍ່ໜີ້ຂອງກຸ່ມໄວອອກແຮງງານໃນນະຄອນຫຼວງວຽງຈັນໃນຊ່ວງການແຜ່ລະບາດຂອງພະຍາດໂຄວິດ-19.

             ກຸ່ມຕົວຢ່າງທີ່ໃຊ້ໃນການວິໄຈຄັ້ງນີ້ ມີຈຳນວນ 318 ຄົນ ໂດຍໃຊ້ແບບສອບຖາມເປັນເຄື່ອງມືໃນການເກັບກໍາຮວບຮວມຂໍ້ມູນ ແລະ ວິເຄາະແບບສອບຖາມ ໂດຍໃຊ້ສະຖິຕິພັນລະນາ ເພື່ອຫາຄວາມຖີ່, ຄ່າສ່ວນຮ້ອຍ, ຄ່າສະເລ່ຍ ແລະ ຄ່າຜັນປ່ຽນມາດຕະຖານ. ທົດສອບສົມມຸດຖານດ້ວຍ t-test, One – Way ANOVA ແລະ Multiple Regression Analysis. ການຄົ້ນຄວ້າພົບວ່າ: ຄວາມຮູ້ທາງການເງິນຂອງກຸ່ມໄວອອກເເຮງງານທີ່ມີການກໍ່ໜີ້ ແມ່ນມີຄະແນນຄວາມຮູ້ທາງການເງິນໜ້ອຍ ກວ່າກຸ່ມຄົນໄວອອກແຮງງານທີ່ບໍ່ມີໜີ້. ຜົນການທົດສອບສົມມຸດຖານພົບວ່າ: ກຸ່ມໄວອອກແຮງງານທີ່ມີລະດັບການສຶກສາທີ່ແຕກຕ່າງກັນ ໃຫ້ຄວາມຄິດເຫັນຕໍ່ການກໍ່ໜີ້ຊ່ວງການແຜ່ລະບາດຂອງພະຍາດໂຄວິດ-19 ຕ່າງກັນ ຢ່າງມີຄວາມສໍາຄັນທາງສະຖິຕິ 0.05 ແລະ ກຸ່ມໄວອອກແຮງງານທີ່ມີເພດ, ອາຍຸ, ສະຖານະພາບ ແລະ ອາຊີບທີ່ແຕກຕ່າງກັນ ໃຫ້ຄວາມຄິດເຫັນຕໍ່ການກໍ່ໜີ້ຊ່ວງການແຜ່ລະບາດຂອງພະຍາດໂຄວິດ-19 ບໍ່ແຕກຕ່າງກັນ. ຈາກການວິເຄາະປັດໄຈທີ່ມີຜົນຕໍ່ການກໍ່ໜີ້ຂອງກຸ່ມໄວອອກແຮງງານພົບວ່າ: ປັດໄຈດ້ານຮູບແບບການດໍາເນີນຊີວິດ, ພາວະເສດຖະກິດ, ວິກິດຈາກໂຄວິດ-19 ແລະ ທັດສະນະຄະຕິຕໍ່ການເປັນໜີ້ ມີຜົນຕໍ່ການກໍ່ໜີ້ຂອງກຸ່ມໄວເຮັດວຽກໃນນະຄອນຫຼວງວຽງຈັນຊ່ວງສະຖານະການໂຄວິດ-19 ຢ່າງມີຄວາມສໍາຄັນທາງສະຖິຕິ 0.05, ສ່ວນຄວາມຮູ້ທາງການເງິນແມ່ນບໍ່ມີຜົນຕໍ່ການກໍ່ໜີ້.