ປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກ ບີດີພີ ຂອງປະຊາຊົນໃນ ນະຄອນຫຼວງວຽງຈັນ

Factors Affecting the Access to Use of Loan Services Non Deposit Microfinance Institution BDP Among People in Viantiane

Abstract

ບົດຄັດຫຍໍ້
ໃນການສຶກສາຄັ້ງນີ້ແມ່ນໄດ້ສຶກສາໃນຫົວຂໍ້: “ປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກ ບີດີພີ ຂອງປະຊາຊົນໃນ ນະຄອນຫຼວງວຽງຈັນ” ຈຸດປະສົງຫຼັກໃນການສຶກສາ ປະກອບມີ 2 ຈຸດປະສົງຄື: ເພື່ອສຶກສາພຶດຕິກໍາຂອງລູກຄ້າທີ່ເຂົ້າມາໃຊ້ບໍລິການເງິນກູ້, ເພື່ອສຶກສາປັດໄຈທີ່ມີຜົນຕໍ່ການເຂົ້າໃຊ້ບໍລິການເງິນກູ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກ ບີດີພີ. ໃນການສຶກສາຄັ້ງນີ້ແມ່ນໄດ້ນໍາໃຊ້ແບບສອບຖາມເປັນເຄື່ອງມືໃນການເກັບກໍາຂໍ້ມູນຈໍານວນ 200 ສະບັບ ແລະ ນໍາໃຊ້ວິທີການວັດແທກການບໍລິການເງິນກູ້ໂດຍໃຊ້ Program SPSS ມາຄິດໄລ່ພ້ອມຫຼັກການພັນລະນາ ໂດຍວິເຄາະໃນຮູບແບບຂອງຈໍານວນ, ສ່ວນຮ້ອຍ (%), ຄ່າສະເລ່ຍ ແລະ ຄ່າຜັນປ່ຽນມາດຕະຖານ.
ຈາກຜົນຂອງການສຶກສາໃນຄັ້ງນີ້ພົບວ່າ ລູກຄ້າທີ່ເຂົ້າມາໃຊ້ບໍລິການເງິນກູ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກ ບີດີພີ ລູກຄ້າສ່ວນໃຫຍ່ແມ່ນເປັນເພດຍິງຫຼາຍກວ່າເພດຊາຍມີຈໍານວນ 52 ຄົນ ກວມເອົາ 52.0 ສ່ວນຮ້ອຍ, ມີສະຖານະພາບແຕ່ງງານມີຈໍານວນ 84 ຄົນ ກວມເອົາ 84.0 ສ່ນຮ້ອຍ, ສ່ວນໃຫຍ່ມີອາຍຸລະຫວ່າງ 41-60 ປີ ມີຈໍານວນ 67 ຄົນ ກວມເອົາ 67.0 ສ່ວນຮ້ອຍ,ສ່ວນໃຫຍ່ແມ່ນຈົບການສຶກສາລະດັບມັດຖະຍົມມີຈໍານວນ 38 ຄົນ ກວມເອົາ 38.0 ສ່ວນຮ້ອຍ, ສ່ວນໃຫຍ່ມີອາຊີບຄ້າຂາຍມີຈໍານວນ 35 ຄົນ ກວມເອົາ 35.0 ສ່ວນຮ້ອຍ ແລະ ມີລາຍໄດ້ຕໍ່ເດືອນ 3,000,001-5,000,000 ກີບ ມີຈໍານວນ 47 ຄົນ ກວມເອົາ 47.0 ສ່ວນຮ້ອຍເປັນສ່ວນໃຫຍ່.
ຈາກຜົນການສຶກສາປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ກັບສະຖາບັນການເງິນຈຸລະພາກທີ່ບໍ່ຮັບເງິນຝາກ ບີດີພີ ເຫັນໄດ້ວ່າ: ເພດທີ່ແຕກຕ່າງກັນໃຫ້ຄວາມສໍາຄັນກັບປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ທີ່ບໍ່ແຕກຕ່າງກັນ, ອາຍຸທີ່ແຕກຕ່າງກັນໃຫ້ຄວາມສໍາຄັນກັບປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ທີ່ບໍ່ແຕກຕ່າງກັນ, ອາຊີບທີ່ແຕກຕ່າງກັນເຫັນວ່າໃຫ້ຄວາມສໍາຄັນກັບປັດໄຈດ້ານຜະລິດຕະພັນເງິນກູ້ທີ່ແຕກຕ່າງກັນ ແລະ ໃຫ້ຄວາມສໍາຄັນກັບປັດໄຈດ້ານຕົ້ນທຶນໃນການກູ້ຢືມ, ປັດໄຈທີ່ສົ່ງເສີມການໃຊ້ບໍລິການ ແລະ ປັດໄຈດ້ານບຸກຄະລາກອນເຫັນວ່າບໍ່ແຕກຕ່າງກັນ ແລະ ລາຍໄດ້ຕໍ່ເດືອນທີ່ແຕກຕ່າງກັນໃຫ້ຄວາມສໍາຄັນກັບປັດໄຈທີ່ມີຜົນຕໍ່ການຕັດສິນໃຈເຂົ້າໃຊ້ບໍລິການເງິນກູ້ທີ່ບໍ່ແຕກຕ່າງກັນ.