ປັດໄຈທີ່ມີຜົນຕໍ່ການຕັດສິນໃຈຂອງນັກຮຽນຊັ້ນມໍປາຍ ໃນການເລືອກສຶກສາຕໍ່ໃນລະດັບຊັ້ນສູງ (ກໍລະນີສຶກສາ: ນັກຮຽນ ມສ.ໂພນໂຮງ ແລະ ມສ.ໂພນໝີ)
Factors Affecting High School Students Decision of Choosing Study for Higher Education (Case Study: Students at Phonhong and Phonemy Secondary School)
ນາງ ນິລັດດາ ຫຼວງສີດາ
ນາງ ສີສົມພອນ ພວງວິໄລ
ບົດຄັດຫຍໍ້
ສຶກສາປັດໄຈທີ່ມີຜົນຕໍ່ການຕັດສິນໃຈຂອງນັກຮຽນຊັ້ນມໍປາຍໃນການເລືອກສຶກສາຕໍ່ໃນ ລະດັບຊັ້ນສູງ ກໍລະນີສຶກສາ: ນັກຮຽນ ມສ.ໂພນໂຮງ ແລະ ມສ.ໂພນໝີ, ມີ 3 ຈຸດປະສົງຄື: ເພື່ອວິເຄາະຈໍານວນນັກຮຽນທີ່ຕັດສິນໃຈເລືອກສຶກສາຕໍ່ ຫຼື ບໍ່ສຶກສາຕໍ່ໃນລະດັບຊັ້ນສູງ ລວມເຖິງ ສາເຫດຂອງນັກຮຽນທີ່ຕັດສິນໃຈບໍ່ສຶກສາຕໍ່, ວິເຄາະລະດັບຄວາມສໍາຄັນຂອງປັດໄຈທີ່ມີຜົນຕໍ່ການ ຕັດສິນໃຈຂອງນັກຮຽນຊັ້ນມໍປາຍໃນການເລືອກສຶກສາຕໍ່ໃນລະດັບຊັ້ນສູງ ແລະ ປຽບທຽບລະດັບ ຄວາມສໍາຄັນຂອງປັດໄຈທີ່ມີຜົນຕໍ່ການຕັດສິນໃຈເລືອກສຶກສາຕໍ່ ໂດຍແຍກຕາມ ເພດ, ອາຍຸ, ລໍາ ດັບທີຮຽນ, ການໄດ້ຮັບຂ່າວສານທາງການສຶກສາ, ຜູ້ປົກຄອງຫຼັກ, ລາຍໄດ້ຂອງຜູ້ປົກຄອງ, ອາຊີບຜູ້ປົກຄອງ. ກຸ່ມຕົວຢ່າງທີ່ໃຊ້ໃນການສຶກສາ ຈໍານວນ 242 ຄົນ ໂດຍມີເຄື່ອງມືທີ່ໃຊ້ໃນ ການວິໄຈຄືແບບສອບຖາມ. ການວິເຄາະຂໍ້ມູນແມ່ນ ນໍາໃຊ້ໂປຣແກຣມ SPSS ແລະ ສະຖິຕິທີ່ໃຊ້ ແມ່ນ ຄວາມຖີ່, ອັດຕາສ່ວນຮ້ອຍ, ຄ່າສະເລ່ຍ ແລະ ຄ່າຜັນປ່ຽນມາດຕະຖານ.
ຜົນການວິເຄາະຈໍານວນນັກຮຽນທີ່ຕັດສິນໃຈເລືອກສຶກສາຕໍ່ ຫຼື ບໍ່ສຶກສາຕໍ່ໃນລະດັບຊັ້ນສູງ ພົບວ່າ: ນັກຮຽນທີ່ຕັດສິນໃຈເລືອກສຶກສາຕໍ່ສ່ວນຫຼາຍເປັນເພດຍິງ ມີຈໍານວນ 198 ຄົນ ກວມເອົາ 81.8 ສ່ວນຮ້ອຍ ເປັນກຸ່ມນັກຮຽນທີ່ມີຜົນການຮຽນດີເຊິ່ງໄດ້ລໍາດັບທີ 1-14 ຂອງຫ້ອງ ແລະ ນັກຮຽນທີ່ຕັດສິນໃຈບໍ່ສຶກສາຕໍ່ສ່ວນຫຼາຍເປັນເພດຊາຍ ມີຈໍານວນ 44 ຄົນ ກວມເອົາ 18.2 ສ່ວນ ຮ້ອຍ ເປັນກຸ່ມນັກຮຽນທີ່ມີຜົນການຮຽນປານກາງເຊິ່ງໄດ້ລໍາດັບທີ 15-29 ຂອງຫ້ອງ. ເຫດຜົນທີ່ ນັກຮຽນເລືອກບໍ່ສຶກສາຕໍ່ ແມ່ນເນື່ອງມາຈາກການຂາດແຄນທຶນທາງການສຶກສາ ເລີຍເລືອກທີ່ຈະ ຫາວຽກເຮັດງານທໍາເລີຍຫຼັງຈາກຮຽນຈົບເພື່ອບໍ່ໃຫ້ເປັນພາລະຂອງຄອບຄົວ. ຜົນການວິເຄາະປັດ ໄຈທີ່ມີຜົນຕໍ່ການຕັດສິນໃຈເລືອກສຶກສາຕໍ່ໃນລະດັບຊັ້ນສູງຂອງນັກຮຽນຊັ້ນມໍປາຍ ໂດຍພາບລວມ ແມ່ນມີຄ່າສະເລ່ຍ 3.72, ຈາກການວິເຄາະພົບວ່າ ມີ 2 ດ້ານທີ່ມີລະດັບຄວາມສໍາຄັນຫຼາຍໄດ້ແກ່: ດ້ານທັດສະນະຄະຕິຕໍ່ການຮຽນ ມີຄ່າສະເລ່ຍ 4.05 ແລະ ດ້ານແຮງຈູງໃຈຕໍ່ຄວາມສໍາເລັດ ມີຄ່າ ສະເລ່ຍ 3.93. ຜົນການວິເຄາະປຽບທຽບປັດໄຈລາຍກຸ່ມຕາມ ເພດ, ອາຍຸ, ລໍາດັບທີຮຽນ, ການ ໄດ້ຮັບຂ່າວສານທາງການສຶກສາ, ຜູ້ປົກຄອງຫຼັກ, ລາຍໄດ້ຕໍ່ເດືອນຂອງຜູ້ປົກຄອງ, ອາຊີບຜູ້ ປົກຄອງ ພົບວ່າ: ນັກຮຽນທີ່ມີ ລໍາດັບທີຮຽນຕ່າງກັນ ແມ່ນມີການຕັດສິນໃຈເລືອກສຶກສາຕໍ່ໃນ ລະດັບຊັ້ນສູງທີ່ແຕກຕ່າງກັນໃນດ້ານແຮງຈູງໃຈຕໍ່ຄວາມສໍາເລັດ. ສ່ວນທີ່ເຫຼືອ ແມ່ນມີການຕັດສິນ ໃຈເລືອກສຶກສາຕໍ່ໃນລະດັບຊັ້ນສູງບໍ່ແຕກຕ່າງກັນ.
Download