ໃນວັນທີ 28 ເມສາ 2021 ນີ້, ມະຫາວິທະຍາໄລແຫ່ງຊາດ (ມຊ) ໄດ້ມີການ ພົ່ນຢາຂ້າເຊື້ອ ເພື່ອຕ້ານການລະບາດ ແລະການແພ່ເຊື້ອຂອງພະຍາດໂຄວິດ 19 ໂດຍໄດ້ຮັບການຊ່ວຍເຫຼືອຈາກ ໜ່ວຍກູ້ໄພມູນນິທີຈີນນະຄອນຫຼວງວຽງຈັນ ( 1628) ເຊິ່ງນໍາໂດຍ ທ່ານ ຊ້າງ ອິນທີລາດ ຫົວໜ້າໜ່ວຍກູ້ໄພມູນນິທີຈີນນະຄອນຫຼວງວຽງຈັນ (1628) ພ້ອມດ້ວຍທີມງານ, ໂດຍທາງ ມຊ ນໍາພາໂດຍ ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມຊ, ທັງເປັນຮອງປະທານຄະນະຊີ້ນໍາ ວຽກງານສະກັດກັ້ນ, ການແພ່ລະບາດ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ 19 ຂອງ ມຊ ພ້ອມດ້ວຍຄະນະ ເຂົ້້າຮ່ວມ.

          ໃນການສີດຢາຂ້າເຊື້ອຄັ້ງນີ້ ກໍເພື່ອຕ້ານການແພ່ລະບາດຂອງພະຍາດໂຄວິດ 19 ໃນ ສປປລາວ ໂດຍສະເພາະໃນສະຖາບັນການສຶກສາ ກໍຄືໃນຂອບເຂດຂອງ ມຊ ໃຫ້ມີຄວາມປອດໄພ ແລະຫຼີກລຽງຈາກສະຖານບໍໃຫ້ມີຄວາມສ່ຽງ ຕໍ່ການຕິດເຊື້ອ ແລະການແພ່ລະບາດຂອງພະຍາດໂຄວິດ 19 ເພື່ອໃຫ້ບັນດາສະຖານທີ່ຕ່າງໆໃນ ມຊ ເຊັ່ນ: ສໍານັກງານອະທິການບໍດີ, ຫ້ອງການ, ຄະນະວິຊາ, ຫ້ອງຮຽນ, ຫໍສະໝຸດກາງ, ໂຮງໝໍ, ຫໍພັກນັກສຶກສາລາວ-ຕ່າງປະເທດ, ສະໜາມກີລາກາງ ແລະສະຖານທີ່ການສຶກສາຕ່າງໆຂອງນັກສຶກສາ ມຊ ໃຫ້ມີຄວາມປອດໄພຫຼາຍຂຶ້ນ.
          ສໍາລັບການສີດຢາຂ້າເຊື້ອຄັ້ງນີ້ ໜ່ວຍກູ້ໄພມູນນິທີຈີນນະຄອນຫຼວງວຽງຈັນ (1628) ໄດ້ນໍາພາກ້ອນກໍາລັງຂອງ ອາສາ ຈໍານວນ 30 ຄົນ, ແລະແບ່ງອອກເປັນ 5 ທີມ, ທີມລະ 6 ຄົນ; ນໍາໃຊ້ພາຫະນະ ຈໍານວນ 6 ຄັນ ແລະເຄື່ອງຈັກພົ່ນຢາຂ້າເຊື້ອ ຈໍານວນ 7 ເຄື່ອງ. ສໍາລັບສະຖານທີ່ການສີດຢາຂ້າເຊື້ອຄັ້ງນີ້ແມ່ນມີ: ສໍານັກງານອະທິການບໍດີ, ບັນດາຫ້ອງການ, ບັນດາແຕ່ລະຄະນະວິຊາ, ຫ້ອງຮຽນ, ຫໍສະໝຸດກາງ, ໂຮງໝໍວິທະຍາວິທະຍາເຂດດົງໂດກ, ສະຖາບັນບັນພັດທະນາຊັບພະຍາກອນມະນຸດ ລາວ-ຢີ່ປຸ່ນ, ສະຖາບັນຂົງຈື, ຫໍພັກຊີເກມ, ຫໍພັກນັກສຶກສາລາວ-ຕ່າງປະເທດ ລວມໄປເຖິງໂຮງຮຽນປະຖົມ-ມັດທະຍົມ ສາທິດ ອີກດ້ວຍ.

ຂ່າວ ແລະພາບ: ພົນ ບຸນພະຈັນ.