ພາສາ​ລາວ	​ຫຼັກສູດປະລິນຍາເອກ ສາຂາການບໍລິຫານທຸລະກິດ
ພາສາ​ອັງກິດ	Doctor of Philosophy Program in Business  Administration

ປັດ​ຊະ​ຍາ

 ສ້າງບັນດິດໃຫ້ມີຄວາມຮູ້ ແລະ ຄວາມສາມາດລະດັບສູງ, ໄດ້ມາດຕະຖານທາງດ້ານວິຊາການໃນການຄົ້ນຄວ້າວິທະຍາສາດ ສາຂາການບໍລິຫານທຸລະກິດຈົນສາມາດສ້າງຄວາມຮູ້ໃໝ່, ມີວິໄສທັດໃນການພັດທະນາຂັ້ນສູງ ແລະ ສາມາດບໍລິຫານທຸລະກິດຢ່າງມີປະສິດທິພາບ ແລະ ປະສິດທິີຜົນ ເພື່ອໃຫ້ບັນລຸເປົ້າໝາຍຂອງອົງກອນ ແລະ ຜົນປະໂຫຍດໂດຍລວມຂອງສັງຄົມ.

ຈຸດປະສົງ

ເພື່ອສ້າງບັນດິດໃນລະດັບປະລິນຍາເອກທີ່ສາມາດກໍາແໜ້ນດ້ານທິດສະດີ, ວິຊາສະເພາະ, ທັກສະ, ວິທີການ ແລະ ຄວາມຮູ້ທີ່ກ່ຽວຂ້ອງໃນສາຂາບໍລິຫານທຸລະກິດຢ່າງເປັນລະບົບ, ກວ້າງຂວາງ, ເລິກເຊິ່ງ ແລະ   ມີຄວາມສາມາດເຮັດການຄົ້ນຄວ້າວິທະຍາສາດ, ສ້າງນະວັດຕະກໍາໃໝ່ ແລະ ສາມາດມາໝູນໃຊ້ໃນວຽກງານຕົວຈິງໃນດ້ານການບໍລິຫານທຸລະກິດ  ກໍ່ຄືການພັດທະນາປະເທດຊາດໄດ້.

ຄາດໝາຍຜົນການຮຽນ

ດ້ານຄວາມຮູ້

• ຍົກລະດັບຮອບຮູ້ທາງດ້ານແນວຄິດ, ທິດສະດີ ແລະ ຫຼັກການດ້ານການບໍລິຫານທຸລະກິດໃຫ້ແກ່ຜູ້ບໍລິຫານໃນທາງເລິກ ເພື່ອໃຫ້ສາມາດປະຍຸກໃຊ້ກັບອົງກອນຂອງຕົນໄດ້ຢ່າງມີປະສິດທິຜົນ.

• ພັດທະນາທັກສະໃຫ້ແກ່ຜູ້ບໍລິຫານໃນການວິໄຈຂໍ້ມູນຢ່າງມີວິທີການ ແລະ ມີຂັ້ນຕອນທີ່ເປັນລະບົບໃນການວິເຄາະຂໍ້ມູນ ຈົນເປັນຜູ້ຊ່ຽວຊານໃນການພັດທະນາ ແລະ ການບໍລິຫານທຸລະກິດຢ່າງສ້າງສັນແບບມືອາຊີບ.

ດ້ານທັກສະ ແລະ ການນຳໃຊ້

• ສາມາດປະຍຸກໃຊ້ຄວາມຮູ້ທາງດ້ານທິດສະດີທີ່ກ່ຽວຂ້ອງ ແລະ ນຳໃຊ້ຂະບວນການໃນການວິໄຈເພື່ອສ້າງຄວາມຮູ້ໃໝ່ເຂົ້າໃນການບໍລິຫານ ເພື່ອວິເຄາະ, ສັງເຄາະ ແລະ ແກ້ໄຂບັນຫາທາງທຸລະກິດໄດ້ຢ່າງສ້າງສັນ ແລະ ມີປະສິດທິພາບ.

• ສາມາດວິເຄາະ ແລະ ວິພາກປະເດັນ ແລະ ບັນຫາກ່ຽວກັບການດຳເນີນງານຂອງທຸລະກິດຕາມຍຸກສະ ໄໝ ໂດຍນຳໃຊ້ຫຼັກການ ແລະ ທິດສະດີທີ່ກ່ຽວຂ້ອງໄດ້ຢ່າງເລິກເຊິ່ງ.

• ສາມາດຖ່າຍທອດ ແລະ ສະແດງທັກສະຂັ້ນສູງໃນການສື່ສານດ້ວຍວາຈາ ແລະ ຖ່າຍທອດເປັນລາຍລັກອັັກສອນທາງທຸລະກິດ.

• ສາມາດວິເຄາະຂໍ້ມູນການວິໄຈ ແລະ ສະທ້ອນໃຫ້ເຫັນຢູ່ໃນຜົນການວິເຄາະຢ່າງເລິກເຊິ່ງ.

• ເປັນຜູ້ນຳໃນການບໍລິຫານທຸລະກິດເພື່ອການພັດທະນາແບບຍືນຍົງ, ມີຄວາມສົນໃຈໃນການສະແຫວງຫາຄວາມຮູ້ໃໝ່, ມີປະຕິສຳພັນກັບຄົນອື່ນຢ່າງສ້າງສັນ ແລະ ສາມາດສື່ສານໃນອົງກອນໄດ້ຢ່າງມີປະສິດທິພາບດ້ວຍເຕັກໂນໂລຊີທັນສະໄໝທີ່ເໝາະສົມ.

ດ້ານທັກສະທາງສັງຄົມ

• ສ້າງບັນດິດໃຫ້ມີຫລັກໝັ້ນການເມືອງ, ມີ​ຄວາມ​ຈົງ​ຮັກ​ພັກ​ດີ​ຕໍ່​ປະ​ເທດ​ຊາດ, ຮັກລະບອບປະ​ຊາ​ທິ​ປະ​ໄຕປະ​ຊາ​ຊົນ, ຢຶດໝັ້ນ​​ຕາມແນວທາງ​ການ​ນຳພາ​ຂອງ​ພັກ ​ແລະ ການ​ຄຸ້ມ​ຄອງ​ຂອງ​ລັດ.
• ສ້າງນັກບໍລິຫານທຸລະກິດໃຫ້ເປັນທີ່ມີຈັນຍາບັນສູງຕໍ່ສັງຄົມ ແລະ ໃຫ້ການຊ່ວຍເຫຼືອສັງຄົມ.

ກຳນົດເວລາ​ການ​ເປີດ​ສອນ  

ແຜນກຳນົດການເປີດສອນຫຼັກສູດລະດັບປະລິນຍາເອກ ສາຂາການບໍລິຫານທຸລະກິດແມ່ນຈະເລີ່ມຕົ້ນຂຶ້ນແຕ່ສົກສຶກສາ 2020-2021 ເປັນຕົ້ນໄປ. ​ເມື່ອ​ນັກສຶກສາປະລິນຍາ​ເອກ​ສຳເລັດການສຶກສາໃນ​ຊຸດ​ທີ 1 ແລ້ວ ຈຶ່ງຈະ​ມີ​ການ​ປະ​ເມີນຄຸນນະພາບຂອງ​ຫຼັກສູດ​ຄືນ​ໃໝ່ ເພື່ອທົບທວນ ແລະ ປັບປຸງຫຼັກສູດໃຫ້ສອດຄ່ອງກັບຄວາມຕ້ອງການຂອງນັກສຶກສາ ກໍ່ຄືຄວາມຕ້ອງການຂອງຕະຫຼາດແຮງງານໃນສາຂາການບໍລິຫານທຸລະກິດລະດັບປະລິນຍາເອກ.

 

ເງື່ອນ​ໄຂຂອງ​ຜູ້​ເຂົ້າ​ສຶກສາ

ຜູ້ມີເງື່ອນໄຂເຂົ້າສຶກສາລະດັບປະລິນຍາເອກ ສາຂາບໍລິຫານທຸລະກິດ ຕ້ອງໄດ້ຕາມເງື່ອນໄຂທີ່ໄດ້ກຳນົດຂຶ້ນດັ່ງຕໍ່ໄປນີ້:

1. ແມ່ນຜູ້ສຳ​ເລັດ​ການ​ສຶກສາລະ​ດັບ​ປະລິນຍາ​ໂທ ສາຂາການ​ບໍລິຫານທຸລະກິດ ຫຼື ສາຂາລົງເລິກຂອງການບໍລິຫານທຸລະກິດ ຈາກສະຖາບັນການສຶກສາທັງພາຍໃນ ຫຼື ຕ່າງປະເທດທີ່ຜ່ານການຮັບຮອງຈາກກະຊວງສຶກສາທິການ ແລະ ກິລາ. ສາຂາລົງເລິກຂອງການບໍລິຫານທຸລະກິດ ໄດ້ແກ່ສາຂາ ການ​ເງິນ, ການບັນຊີ, ການທະນາຄານ, ການຕະຫລາດ, ການບໍລິຫານຕ່ອງໂສ້ການສະໜອງ ຫຼື ການປະກອບກິດຈະການ.
2. ຜູ້ທີ່ມີຄະແນນສະເລັ່ຍໃນລະດັບປະລິນຍາໂທຕໍ່າສຸດ 3.00 ຈາກລະບົບ 4 ລະດັບຄະແນນ ຫຼື ທຽບເທົ່າ.
3. ເປັນຜູ້ທີ່ຕ້ອງມີປະສົບການໃນການເຮັດວຽກຢ່າງໜ້ອຍ 2 ປີ ຫຼັງຈາກຮຽນຈົບລະດັບປະລິນຍາໂທ ແຕ່ຖ້າມີຜົນການຮຽນໃນລະດັບປະລິນຍາໂທໃນລະດັບດີເລີດກໍ່ບໍ່ຈຳເປັນຕ້ອງມີປະສົບການໃນການເຮັດວຽກໃນຕຳແໜ່ງບໍລິຫານ.
4. ຕ້ອງຮູ້​ພາສາ​ອັງກິດ​ໃນ​ລະດັບ​ດີ ແລະ ສາມາດ​ສະ​ເໜີ​ບົດ​ວິໄຈຕໍ່​ກອງ​ປະຊຸມ​ວິຊາ​ການ ທັງຢູ່​ພາຍ​ໃນ ຫຼື ຕ່າງປະ​ເທດ​ໄດ້.
5. ມີຄວາມຮູ້, ທັກສະ ແລະ ການນຳໃຊ້ທາງດ້ານຄອມພິວເຕີໃນລະດັບດີ, ສາມາດຄົ້ນຫາຂໍ້ມູນ ແລະ ບົດວິໄຈວິທະຍາສາດທີ່ກ່ຽວຂ້ອງໃນອິນເຕີເນັດໄດ້.

ວິທີການ​ຄັດ​ເລືອກ​ຜູ້​ເຂົ້າ​ສຶກສາ

ຜູ້​ທີ່ຈະ​ເຂົ້າ​ສຶກສາ​​ໃນ​ລະດັບປະລິນຍາ​ເອກ​​ບໍລິຫານທຸລະກິດ ຕ້ອງ​ຜ່ານ​ການ​ຄັດ​ເລືອກ​ດ້ວຍ​ການ​ສອບ​ເສັງ​ຄັດເລືອກດັ່ງ​ນີ້:

1. ການຄັດ​ເລືອກຕາມ​​ເອກະສານຂອງ​ຜູ້​ສະໝັກ​ຮຽນ.
2. ສອບເສັງວິຊາບໍລິຫານທຸລະກິດ, ສະຖິຕິທຸລະກິດ ແລະ ພາສາອັງກິດທຸລະກິດ.
3. ການ​ສຳພາດຂອງຄະນະກຳມະການສອບເສັງຄັດເລືອກ ທີ່ໄດ້ຮັບການແຕ່ງຕັ້ງຈາກຄະນະເສດຖະສາດ ແລະ ບໍລິຫານທຸລະກິດ.

ຈາກນັ້ນ ຄະນະຮັບຜິດຊອບຈະຄັດເລືອກຕາມຜົນການສອບເສັງ ແລະ ຜົນການສຳພາດ ແລ້ວລາຍງານໃຫ້ຫ້ອງການສຶກສາຫລັງປະລິນຍາຕີຂອງມະຫາວິທະຍາໄລແຫ່ງຊາດ ເພື່ອຂໍອະນຸມັດຈາກກະຊວງສຶກສາທິການ ແລະ ກິລາ ກໍ່ຄືຈາກກົມ​ການສຶກສາຊັ້ນສູງ ເພື່ອເປີດຫຼັກສູດ.

ການຈັດຕັ້ງການ​ຮຽນ-ການ​ສອນ

ຫຼັກສູດ​ນີ້ ເປັນ​ຫຼັກສູດ​ທີ່ມີການຈັດຕັ້ງການຮຽນ-ການສອນແບບເຕັມເວລາ (Full time) ທີ່ໃຊ້ພາສາລາວເປັນພາສາໃນການຮຽນ-ການສອນ, ໃຊ້ຕຳລາທັງພາສາລາວ ແລະ ພາກສາອັງກິດ ລວມທັງບົດວິໄຈທີ່ເປັນພາສາອັງກິດ ຫຼື ພາສາຕ່າງປະເທດອື່ນໆ ເປັນເອກະສານປະກອບການຮຽນ-ການສອນ ແລະ ໃນການເຮັດບົດວິໄຈ ເຊິ່ງໄລຍະເວລາໃນການ​ສຶກສາ 3 ປີ.​ ການດຳ​ເນີນ​ການຮຽນ-ການສອນແມ່ນມີໃນວັນຈັນ ເຖິງ ວັນອາທິດ. ພາກຮຽນທີ 2 ຂອງປີທີ 1 ແລະ ພາກຮຽນ 1 ຂອງປີທີ 2 ແມ່ນໄລຍະເວລາສຳລັບການປ້ອງກັນຫົວຂໍ້ ແລະ ປ້ອງ​ກັນໂຄງຮ່າງວິທະຍາ​ນິພົນ ຕາມລຳດັບ. ຈາກ​ນັ້ນ ນັກ​ສຶກສາຈະ​ຕ້ອງ​ດຳ​ເນີນ​ການຄົ້ນຄວ້າວິໄຈ, ນຳ​ສະ​ເໜີຜົນ​ການວິໄຈ, ຮີບ​ໂຮມ​ຜົນ​ການວິໄຈຂອງຕົນເອງປະກອບ​ເປັນບົດວິທະຍາ​ນິພົນໃນໄລຍະທີ 3 ແລະ ທີ 4 ເພື່ອປ້ອງ​ກັນ​ຕໍ່ໜ້າຄະນະ​ກຳມະການທີ່​ຖືກ​ແຕ່ງຕັ້ງຈາກຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດ. ຄຽງຄູ່​ກັບ​ການ​ຮຽນ-ການ​ສອນ​ໃນ​ຫ້ອງ​ຮຽນ​ແລ້ວ ນັກສຶກສາປະລິນຍາເອກ​ຕ້ອງ​ເຂົ້າຮ່ວມ​ກິດ​ຈະ​ກຳ​ທັດ​ສະ​ນະ​ສຶກ​ສາ​ພາຍ​ໃນປະເທດ ຫຼື ຕ່າງ​ປະ​ເທດ ຢ່າງ​ໜ້ອຍ​ 1 ​ຄັ້ງ​ຕໍ່​ໜຶ່ງ​ຊຸດ​ຮຽນ. ນອກຈາກນັ້ນ ນັກສຶກສາຕ້ອງໄດ້ພິມບົດຄວາມລົງວາລະສານວິທະຍາສາດພາຍໃນປະເທດ 1 ບົດ, ຕ່າງປະເທດຢ່າງໜ້ອຍ 1 ບົດ ແລະ ຕ້ອງໄດ້ນຳສະເໜີເພື່ອເຜີຍແຜ່ຜົນການວິໄຈວິທະຍາສາດຂອງຕົນໃນກອງປະຊຸມວິຊາການລະດັບນານາຊາດຢູ່ພາຍໃນ ຫລື ຕ່າງປະເທດຢ່າງໜ້ອຍ 1 ຄັ້ງ.

ໄລຍະ​ເວລາ​ການ​ສຶກສາ

ໃນຫຼັກສູດປະລິນຍາເອກສາຂາການບໍລິຫານທຸລະກິດ ນັກສຶກສາໃຊ້ເວລາຄົ້ນຄວ້າ​ວິໄຈຕ່ຳ​ສຸດເປັນເວລາ 3 ປີ (6 ພາກຮຽນປົກກະຕິ) ຫຼື​ ສູງ​ສຸດ​ບໍ່​ເກີນ 5 ປີ (10 ພາກຮຽນປົກກະຕິ). ຖ້ານັກສຶກສາບໍ່ສາມາດຮຽນຈົບພາຍໃນ 3 ປີ ນັກສຶກສາຈະຕ້ອງໄດ້ລົງທະບຽນເພື່ອຮັກສາສະຖານະພາບຕື່ມອີກເປັນເວລາ 2 ປີ ຕາມລະບຽບການຂອງມະຫາວິທະຍາໄລແຫ່ງຊາດວາງອອກ.

                        ໄລຍະເວລາການສຶກສາ:        ພາກຮຽນ 1                           ເດືອນມີນາ – ເດືອນພຶດສະພາ

                                                               ພາກຮຽນ 2                              ເດືອນກັນຍາ – ເດືອນພະຈິກ

                        ວັນ-ເວລາຮຽນ:                  ວັນຈັນ-ວັນອາທິດ                         ເວລາ 08:00 – 16:30 ໂມງ

                   ຄ່າຮຽນທັງໝົດ:           62,000,000 ກີບ

ວິຊາໃນແຕ່ລະໝວດ

 

ລຳດັບ	ລະຫັດວິຊາ	ຊື່ວິຊາ	ໜ່ວຍກິດ
1	158RM111	ວິທີ​ການວິໄຈຂັ້ນສູງທາງທຸລະກິດ    (Advanced Research Methodology in Business)	3(3-0-6)
2	158BS111	ສະຖິຕິຂັ້ນສູງສຳລັບການວິໄຈທາງທຸລະກິດ    (Advanced Statistics for Business Research)	3(2-2-5)

 

ໝວດ​ວິຊາ​ສະເພາະມີຈຳນວນທັງໝົດ 12 ໜ່ວຍກິດ ເຊິ່ງລະຫັດວິຊາ, ຊື່ວິຊາ ແລະ ຈຳນວນໜ່ວຍກິດໄດ້ສະແດງໄວ້ໃນຕາຕະລາງ.

 ໝວດ​ວິຊາ​ສະ​ເພາະ

ລຳດັບ	ລະຫັດວິຊາ	ຊື່ວິຊາ	ໜ່ວຍກິດ
1	158BM121	ສຳມະນາບັນຫາ ແລະ ປະເດັນທາງດ້ານການບໍລິຫານທຸລະກິດໃນຍຸກ 4.0    (Seminar in Problems and Issues of Business Management 4.0)	3(3-0-6)
2	158BF121	ສຳມະນາບັນຫາ ແລະ ປະເດັນທາງດ້ານການເງິນທຸລະກິດ    (Seminar in Business Finance Problems and Issues)	3(3-0-6)
3	158BA121	ສຳມະນາບັນຫາ ແລະ ປະເດັນທາງດ້ານບັນຊີທຸລະກິດ    (Seminar in Business Accounting Problems and Issues)	3(3-0-6)
4	158MK121	ສຳມະນາບັນຫາ ແລະ ປະເດັນທາງດ້ານການຕະຫລາດ    (Seminar in Marketing Problems and Issues)	3(3-0-6)

 

ວິທະຍານິພົນມີທັງໝົດ 44 ໜ່ວຍກິດ ເຊິ່ງລະຫັດວິຊາ ແລະ ລາຍລະອຽດໜ່ວຍກິດໄດ້ສະແດງໄວ້ໃນຕາຕະລາງ.

 ວິທະຍານິພົນ

ລຳດັບ	ລະຫັດວິຊາ	ຊື່ວິຊາ	ໜ່ວຍກິດ
1	158TS111	ວິທະຍານິພົນ    (Thesis)	44(0-0-30)

 

ແຜນການຮຽນ-ການສອນ ແລະ ການປ້ອງກັນບົດວິທະຍານິພົນ

ຕະຫຼອດໄລຍະເວລາ 3 ປີ ນັກສຶກສາຈະໄດ້ຮຽນວິຊາໃນໝວດວິຊາລວມ ແລະ ໃນໝວດວິຊາສະເພາະ ໃນພາກຮຽນທີ 1 ແລະ 2 ຂອງປີທີ 1 ໂດຍຄົ້ນຄວ້າໄປຄຽງຄູ່ກັບການພັດທະນາຫົວຂໍ້ການວິໄຈຂອງນັກສຶກສາ ເພື່ອໄປປ້ອງກັນຫົວຂໍ້ໃນພາກຮຽນທີ 2 ຂອງປີທີ 1 ເຊິ່ງເອີ້ນວ່າ ວິທະຍານິພົນ (ໄລຍະທີ 1). ສ່ວນປີທີ 2 ແລະ 3 ຈະເປັນໄລຍະເວລາສຳລັບການຄົນຄວ້າວິໄຈເພື່ອສ້າງບົດວິທະຍານິພົນ  ໂດຍກວມເອົາໄລຍະທີ 2 ເຖິງໄລຍະທີ 4 ດັ່ງສະແດງລາຍລະອຽດໄວ້ໃນຕາຕະລາງລຸ່ມນີ້.

ແຜນການຮຽນ-ການສອນ

ປີຮຽນ	ພາກຮຽນທີ 1	ພາກຮຽນທີ 2
ປີທີ 1	1.    ວິທີ​ການວິໄຈຂັ້ນສູງທາງທຸລະກິດ     2.    ສະຖິຕິຂັ້ນສູງສຳລັບການວິໄຈທາງທຸລະກິດ    3.    ສຳມະນາບັນຫາ ແລະ ປະເດັນທາງດ້ານການບໍລິຫານທຸລະກິດໃນຍຸກ 4.0	1.    ສຳມະນາບັນຫາ ແລະ ປະເດັນທາງດ້ານການ​ເງິນທຸລະກິດ         2.    ສຳມະນາບັນຫາ ແລະ ປະເດັນທາງດ້ານບັນຊີທຸລະກິດ        3.    ສຳມະນາບັນຫາ ແລະ ປະເດັນທາງດ້ານການບໍລິຫານການຕະຫຼາດ     ວິທະຍານິພົນ (ໄລຍະທີ 1)
ປີທີ 2	ວິທະຍານິພົນ (ໄລຍະທີ 2)	ວິທະຍານິພົນ (ໄລຍະທີ 3)
ປີທີ 3	ວິທະຍານິພົນ (ໄລຍະທີ 4)	ວິທະຍານິພົນ (ໄລຍະທີ 4)

 

ໂດຍສົມທົບກັບລະຫວ່າງການຄົ້ນຄວ້າວິໄຈວິທະຍານິພົນຈາກທັງໝົດ 4 ໄລຍະ ກໍ່ຄື ການປ້ອງກັນຫົວຂໍ້, ການປ້ອງກັນໂຄງຮ່າງ, ການປ້ອງກັນຄວາມຄືບໜ້າ ແລະ ປ້ອງກັນບົດວິທະຍານິພົນຄັ້ງສຸດທ້າຍ ແມ່ນເປັນໄປຕາມຕາຕະລາງດ້ານລຸ່ມ.

 

ແຜນການປ້ອງກັນບົດວິທະຍານິພົນ

ຄັ້ງທີ	ແຜນການປ້ອງກັນວິທະຍານິພົນ	ໄລຍະເວລາ
1	ປ້ອງກັນຫົວຂໍ້ (ໄລຍະທີ 1)	ພາກຮຽນ 2 ຂອງປີທີ 1
2	ປ້ອງກັນໂຄງຮ່າງ (ໄລຍະທີ 2)	ພາກຮຽນ 1 ຂອງປີທີ 2
3	ປ້ອງກັນຄວາມຄືບໜ້າ (ໄລຍະທີ 3)	ພາກຮຽນ 2 ຂອງປີທີ 2
4	ປ້ອງກັນບົດວິທະຍານິພົນຄັ້ງສຸດທ້າຍ (ໄລຍະທີ 4)	ພາກຮຽນ 2 ຂອງປີທີ 3